Inwoners en besighede word daaraan herinner om water spaarsamig te gebruik nadat watergebruik die afgelope paar toegeneem het.
Die Stad Kaapstad het ’n gesamentlike somerteiken gestel om daaglikse waterverbruik onder 975 miljoen liter per dag te hou. Hierdie teiken is daarop gemik om die risiko te verminder wat deur ondergemiddelde of onvoorspelbare reënval in 2026 veroorsaak kan word. Teen die einde van Desember was die gemiddelde daaglikse waterverbruik sowat 1 025 miljoen liter, terwyl damvlakke op 70,5% gestaan het.
Hoewel hierdie vlakke steeds relatief gesond is, het die Stad gewaarsku dat aanhoudend hoë verbruik later in die jaar druk op die toevoer kan plaas. Verlede week het die Burgemeesterskomiteelid vir Water en Sanitasie, Raadslid Zahid Badroodien, gesê dat die Stad se hoofvoorsieningsdamme ongeveer 19,2% laer is as op dieselfde tyd verlede jaar. Ten spyte hiervan het die Stad Kaapstad tot dusver nog geen waterbeperkings ingestel nie. Dit is omdat die Nasionale Departement van Water en Sanitasie (DWS) gewoonlik waterbeperkings op watergebruikers toepas. Volgens die ontleding vanaf 1 November 2025 het DWS goedgekeur dat geen waterbeperkings vir Kaapstad in die 2025/2026-hidrologiese jaar nodig is nie.
Faktore wat oorweeg word wanneer daar bepaal word of daar rede tot kommer is, sluit die huidige en vorige jare se damvlakke in, reënvalpatrone in die huidige en komende jare, asook waterverbruik – veral gedurende die warm somermaande. Badroodien het gesê die Stad monitor steeds damvlakke en watergebruik deeglik. “Hoewel daar geen onmiddellike rede tot kommer oor Kaapstad se damvlakke is nie, word inwoners aangemoedig om hul waterverbruik in die komende maande te bestuur om te help voorkom dat waterbeperkings in die toekoms ingestel moet word.”
Volgens die Stad kan vroeë en volgehoue vermindering in watergebruik help om watersekuriteit te beskerm, die kans op skielike beperkings te verminder en voldoende reserwes te verseker indien reënval in 2026 ondergemiddeld is. Aanpassings in watergewoontes by huishoudings, besighede en die toerismesektor is daarom noodsaaklik.
